Wednesday, July 14, 2010

दूहा - जळ री महिमा

दूहा - जळ री महिमा

1.

बूँद बूँद अनमोल है,

पाणी री पत राख,

पाणी मुक्यां पताळ में,

मिटजी थारी साख.

2.

पाणी ढोळ न बावल़ा,

पाणी घणो अमोल,

जिनगी रो आधार है,

समझी ना थूं पोल.

3.

जळ सूं जीवण जगमगै,

जळ जीवण रो सार,

जळ री कीमत जाण ले,

जळ सूं कर ले प्यार.

4.

जळ इमरत जळ जै'र है,

जळ बिन जग है मून,

जळ सूं जगमग जग हुवै,

जळ नीं तो सै' सून.

5.

जळ घी सूं मूं'गो हुवै,

जळ रो नीं है जोड़,

जळ चुक ज्ये तो नीं मिले,

सूनी सगळी ठोड़..

6.

अंजळ जीव नै चाइजै,
बिन अंजळ नीं सार,
अंजळ पूरो कर लेवै,
जग सूं बेड़ो पार..

7.

अन्न जळ रो है पूतल़ो,
कर अन्न जळ रो मान,
बिन अन्न जळ निरजीव थूं,
रख अन्न जळ रो ध्यान..

8.

जळ री जिग्यां न ले सकै,

हुवै चाये अनमोल,

जळ है सब रो बादसा,

कै'वां बजा'र ढोल..

9.

जळ नै क्यूं मैलो करै,

जळ सगलाँ री ज्यान,

जळ नै राख सम्भाळगे,

ज्यूं तलवारां म्यान.

10.

जळ री महिमा जाणले,

जळ नीं तो जग रेत,

जळ नै हाल परोटले,

जळ सूं कर ले हेत..

Srijan by Deendayal Sharma

Date : 26.03.2009


1 comment: